Ipakaammo ti Kondado ti Maui ti maysa nga informational workshop a nairanta a tumulong kadagiti makinkukua a nadadael dagiti sanikuada kadagiti uram iti kabakiran iti Agosto, ken saan pay a nagpirma para iti panagdalus a tinulongan ti gobierno.

Daytoy a workshop ket mangipamaysa iti proseso ti Alternative Debris Removal a kasapulan para kadagiti makinkukua iti sanikua tapno makaaramidda kadagiti napeggad a rugit a bukbukodda wenno kaduada ti natangdanan a kontraktor iti gastosda.

Maangay ti sesion inton Sabado, Pebrero 24, iti kapeteria ti Lahainaluna High School, a masarakan iti 980 Lahainaluna Road, Lahaina, manipud alas tres agingga iti alas 5:30 ti malem Mai-livestream met daytoy iti Facebook Live page ti County of Maui ken maiposte iti YouTube channel ti County of Maui kalpasan ti presentasion.

Ti Alternative Debris Removal Workshop ket mangitampok iti presentasion dagiti pannakabagi manipud iti County of Maui, US Army Corps of Engineers (USACE), ken FEMA, a mangitukon iti napateg nga impormasion maipapan iti proseso ti panagdalus kadagiti rugit ti uram, dagiti magun-od a pagpilian para kadagiti makinkukua iti sanikua, ken gundaway nga agsaludsod. Dagiti topiko a masakupan ket mairaman ti:

• Apay a kasapulan ti permit tapno maaramid a bukodmo ti fire debris removal.
• Ania ti proseso.
• Siasino ti makabael a mangaramid iti panagdalus ken no ania nga impormasion ti kasapulan nga ipaayda tapno mapalubosanda a mangaramid iti panagdalus.
• Ania ti timeframe tapno mausar daytoy a programa.
• Ania ti mapasamak no ti maysa a makinkukua ket saan nga agpirma iti uray ania a programa wenno agdalus nga awan ti permit.

Mainayon pay, addanto dagiti pannakabagi manipud iti US Army Corps of Engineers a mangsungbat kadagiti saludsod no kasano nga aramiden ti USACE ti trabahoda. Adda met ti Tidal Basin a tumulong kadagiti indibidual iti pasamak a pinilida nga agpirma iti panagdalus nga inisponsoran ti gobierno.

Para iti ad-adu pay nga impormasion maipapan iti proseso ti panagdalus kadagiti napeggad a rugit ken dagiti aplikasion ti ROE, pangngaasiyo ta bisitaenyo ti https://www.mauirecovers.org/debrisremoval#about .