Ti US Army Corps of Engineers ket mangburak ti daga inton sumaruno a lawas iti kritikal a proyekto ti linya ti imburnal para iti temporary housing development ti Kilohana, a mangsuporta iti 169 a housing units para kadagiti nakalasat iti uram iti kabakiran. Daytoy a proyekto ket mangpasayaat ti sistema ti imburnal ti komunidad para kadagiti residente ti Fleming Road ken mangipalubos iti masakbayan a pannakapalawa.

Mangrugi ti proyekto ti Lahaina Emergency Sewer System inton Agosto 12. Ramanenna ti panangikabil iti 1,000 a linear feet ti 12-pulgada a sewer main iti igid ti Malo Street ken 1,500 a linear feet ti 8-pulgada a sewer main iti Fleming Rd. Mainayon pay, 26 a lateral 6-pulgada a linya ti imburnal ti maisagana para iti masanguanan a panag-hookup. Adda dagiti pederal, estado ken lokal nga opisial para iti ground blessing ceremony a naikeddeng inton Biernes, Agosto 9 iti Wahikuli park.

Bayat ti panagibangon, namnamaen dagiti panagserra ti nagsangaan ken alternatibo a ruta ti panagserrek tapno masigurado ti kinatalged ken kinaepisiente.
..
Dagiti Naiplano a Ruta ken Petsa ti Trapiko ti Konstruksion:

• Agosto 12 – Sept. 13: Agserra ti nagsasabatan ti Fleming Rd/Honoapiilani Hwy. Ti iseserrek manipud Ainakea Rd/Fleming Rd agingga iti Honoapiilani Hwy ket limitado kadagiti lugan ti konstruksion ken dagiti agnanaed iti Fleming Rd. Adda driveway access dagiti residente malaksid no maar-aramid ti trabaho iti indibidual a driveway-da. Ti panagserrek manipud Fleming Rd/Malo St agingga iti estasion ti lift ket limitado kadagiti lugan ti konstruksion ken dagiti tattao ti County of Maui.
• Sept. 13 – Nov. 8: Mainget ti iseserrek manipud Fleming Rd/Lower Cane Rd agingga iti Fleming Rd/Ainakea Rd kadagiti lugan ti konstruksion ken residente. Adda driveway access dagiti residente malaksid no maar-aramid ti trabaho iti indibidual a driveway-da. Ti panagserrek manipud Fleming Rd/Malo St agingga iti estasion ti lift ket limitado kadagiti lugan ti konstruksion ken dagiti tattao ti County of Maui.
  ..

Nakatulong ti USACE iti panangdisenio ken panangisagana iti Kilohana Temporary Housing Site, panangisayangkat iti earthwork ken utilities installation. Daytoy nga imprastruktura ti mangpabalin iti FEMA a mangikabil kadagiti modular unit, a mangipaay iti kasapulan unay a temporario a balay para kadagiti nakalasat iti uram iti kabakiran bayat a bangonenda manen ti biagda.

Ti pannakaipasdek ti permanente a linya ti imburnal ket maysa a dakkel a milestone iti proseso ti panagsubli ken manayon a pannakapasayaat ti imprastruktura ti komunidad. Makagunggona dayta iti Lahaina ken ti sangakaarrubaan ti Wahikuli babaen ti panangipalubosna kadagiti umili a mangbalbaliw manipud kadagiti cesspool nga agturong iti sistema ti imburnal ti publiko, nga ad-adda a sanitary, sipapanunot iti aglawlaw, ken basbassit ti kasapulan a pannakamantener.

Agtalinaed a naikumit ti USACE a mangsuporta iti komunidad ken mangsigurado nga amin nga aktibidad ti panagibangon ket natalged ken nasigo a maipatungpal. Apresiarenmi ti anus ken pannakaawat dagiti umili bayat nga agtartrabahokami a mangipaay iti nasken a temporario a balay para kadagiti nakalasat iti uram iti kabakiran.

Para iti ad-adu pay nga impormasion, pangngaasiyo ta kontaken ti USACE Hawai'i Wildfires Public Affairs Office iti (808) 835-4062 wenno hawaiifiresmedia@usace.army.mil .