Mapadayawan ti estado ti Hawaiʻi a mangipakaammo iti naballigi a pannakaileppas ti programana a Non-Congregate Sheltering, a nangipaay iti kritikal a pagkamangan ken tulong kadagiti 7,796 nga indibidual ken 3,071 a sangakabbalayan a naidestiero gapu kadagiti uram iti kabakiran ti Lahaina. Daytoy a programa, nga imatmatonan ti estado ken ti American Red Cross (ARC) ken pinunduan ti Federal Emergency Management Agency (FEMA), ket addaan iti napateg nga akem kadagiti panagregget a mangpaimbag kalpasan ti pannakadadael.

Daytoy a gapuanan ket mangipaganetget ti panagkumit ken panagregget a pakairamanan dagiti adu a kasosyo nga ahensia, organisasion ken ti di mabannog a trabaho ti ginasut, no saan a rinibu a mangsupsuporta. Nakatulong amin tapno masigurado a dagidiay naapektaran iti uram iti kabakiran idi Agosto 2023 idiay Lahaina ket nakagun-od iti pannakaaywan ken pagkamangan a kasapulanda. Nasurok a 2,500 a trabahador ken boluntario ti nagserbi iti mision ti NCS, ken ti panagregget ti NCS Task Force ket nagresulta iti nasurok a 1,600 a intermediate housing solutions para kadagiti naapektaran a pamilia. Namin-adu met a napaatiddog ti programa, agingga a nakastrek ti amin a pamilia kadagiti sumaganad nga addangda a solusion iti panagbalay. Bayat ti panangrugi dagitoy nga indibidual ken pamilia iti panagdaliasatda nga agturong iti panagimbag, ti programa ti NCS ket nangipaay iti natalged ken natalinaay nga aglawlaw tapno mangrugida a mangbangon manen iti biagda.

“Ti naballigi a panagbalbaliw manipud iti emerhensia a sungbat agingga iti panagsubli ken intermediate housing ket mangmarka iti maysa a napateg a milestone iti kolektibo a panagreggetmi a mangsuporta kadagidiay naapektaran iti uram iti kabakiran,” kinuna ni Gobernador Josh Green, MD “Daytoy a gapuanan ket maysa a pammaneknek iti dedikasion ken panagtitinnulong dagiti amin a nairaman, ken agyamankami iti di agkupas a suporta manipud iti FEMA, ARC, ken dagiti adu a kasosyo nga organisasionmi. Mainayon pay, ipaayko ti naimpusuan a mahalok kadagiti amin nga otel ken condo operators para iti dagus a suportada kalpasan dagiti uram. Ti kinaparabur ken napartak a panagtignayda nangipaay iti kritikal a pagkamangan ken liwliwa kadagiti di mabilang a pamilia bayat ti panawen ti nakaro a panagkasapulan.”

Bayat ti panagleppas ti programa ti NCS, ti estado, babaen ti pannakitinnulong ti FEMA ken dadduma pay a mangsupsuporta nga organisasion a kas iti Council for Native Hawaiian Advancement (CNHA) ken Global Empowerment Mission (GEM), ket sibaballigi a nangbalbaliw iti adu nga indibidual ken pamilia manipud kadagiti emerhensia a pagkamangan kadagiti ad-adda a natalged a intermediate housing solutions. Dagitoy a solusion ket mairaman ti Rental Assistance Program (RAP) ti estado ken ti programa ti direkta a panagpaabang ti FEMA, ken dadduma pay.

Ti programa ti estado nga RAP, agraman dagiti gannuat ti balay babaen ti CNHA ken dadduma pay a mangsuporta nga organisasion, ket kritikal iti panangipaay kadagiti nadumaduma a solusion ti balay a naibagay a mangpennek kadagiti nadumaduma a kasapulan dagidiay naapektaran. Daytoy a multifaceted approach ti nangisigurado nga awan ti mabati bayat ti panagbangon manen ti komunidad.

“Awan kaasping ti panagtitinnulong iti panangsuporta kadagidiay naapektaran kadagiti uram iti kabakiran,” kinuna ni Brad Kieserman, bise presidente ti Disaster Operations and Logistics para iti American Red Cross. “Ipagpannakkelmi ti nakipagtrabaho kadagiti kasosyomi, agraman ti CNHA, iti co-creating housing solutions a makatulong kadagiti naisangsangayan a kasapulanda ken nainspirarkami iti NCS workforce tapno napartak a sumungbat. Atiddog ti dalan nga agturong iti panagimbag, ngem agtalinaedkami a naikabil iti komunidad ti Maui, tapno agtultuloy a mangbirok kadagiti solusion nga idauluan ti komunidad ken mangbangon iti kinaandur iti napaut a panawen.”

Bayat ti panangrambaktayo iti daytoy a gapuanan iti NCS, agtalinaed a natibker ti amin a kasosyo iti panagkumitda a mangsuporta kadagiti naapektaran kadagiti uram iti kabakiran. Ti estado, agraman dagiti pederal ken saan a makaganansia a kasosyo, ket agtultuloyto a mangipaay kadagiti nasken a rekurso ken tulong, a mangsigurado a tunggal indibidual ken pamilia ket addaan iti gundaway a mangbangon manen ken rumang-ay. Ti kolektibo a kinaandur ken panagkaykaysa ti komunidadtayo ket agtultuloy a mangiturong kadatayo nga agturong iti sango bayat ti panagbalbaliwtayo manipud iti panagimbag agingga iti napaut a kinatalged ken panagdur-as para kadagiti amin nga umili ti Maui.

Impeksa met ni Hawaiʻi Emergency Management Agency Administrator James Barros ti panagyamanna kadagiti komprehensibo a panagregget. “Ti panagleppas ti programa ti NCS itampokna ti panagkumitmi a mangaywan kadagiti umilitayo iti panawen ti krisis,” kinuna ni Barros. “Ti panagtitinnulong ken kākou (panagkaykaysa) nga impakita ti amin a kasosyo nga ahensia ken suportador ti pagarigan ti espiritu ti Hawaiʻi. Sangsangkamaysa nga impakitami ti bileg ti komunidad ken ti nauneg nga epekto ti nagkaykaysa a panagregget iti sango ti rigat. Babaen ti aloha, agtultuloy ti panagtitinnulongtayo tapno masigurado ti naannayas a panagbalbaliw iti napaut a panagsubli ken solusion iti panagbalay.”

Binigbig ni Regional Administrator ti FEMA a ni Robert Fenton ti napigsa a panagtinnulong ti ahensia iti estado, komunidad ken Red Cross, kasta met ti di mabannog a panagregget ti amin a nairaman a tumulong kadagiti tattao ti Lahaina nga agpaimbag. “Nabalinanmi a sibaballigi nga inkabil ti amin iti mas nataltalged a solusion ti balay bayat nga agtultuloy ti panagtrabahomi tapno mangipaay iti ad-adda a natalged a balay,” kinuna ni Fenton.

Dagitoy a nagtipon a panagregget ti gobierno ken komunidad ti nangiyun-una kadagiti tattao ti Maui, nga addaan iti panangipamaysa iti panangtulong kadakuada nga umimbag ken mangbangon manen.

..