HONOLULU — Inpakaammo ita nga aldaw ni Governor Josh Green, MD, a pinili ti Estado ti Hawai’i ken Maui County ti US Army Corps of Engineers (USACE) a mangidaulo kadagiti panagregget a mangikkat kadagiti rugit a nadadael gapu iti uram manipud kadagiti lugar iti intero a Maui a naapektaran kadagiti historiko nga uram idi rugrugi ti Agosto.

“Ti Army Corps of Engineers ket nalatak a kualipikado a mangaramid iti daytoy dakkel nga aramid, tapno matulongan dagiti umili ti Maui nga umabante iti panagdaliasatda nga agpaimbag,” kinuna ni Gobernador Green. “Ti Phase 2 work ket makatulong iti napaut a pannakapatalged dagiti naapektaran a lugar, tapno makabangon manen dagiti residente ken negosio iti wagas a kayat dagitoy a komunidad a maibangon manen dagitoy. Agyamyamankami ken ni Presidente Biden ken amin a federal partners-mi gapu iti kari nga agtakder iti sibaymi, kas kinuna ti presidente, ‘no la ketdi kasapulan.’”

“Iti panagsasarita iti FEMA, nagun-odmi ti pannakaawat a maited ti ekstra a konsiderasion iti pannakaikabil dagiti eksperto iti kultura ti Hawai’i iti mision,” kinuna ni Gobernador Green. “Adda met ti panangipamaysa iti panangusar kadagiti lokal a negosio ken panagbayad kadagiti agsaksaknap a tangdan para iti panagregget a mangikkat kadagiti rugit.”

“Babaen ti pannakapili ti Army Corps of Engineers, nasayaat ti kasasaad ti Maui tapno mabayadan ti kritikal ken nasaknap a trabaho a panangikkat kadagiti rugit babaen kadagiti pederal a rekurso,” kinuna ni Maui County Mayor Richard Bissen. “Daytoy ket napateg nga addang ken segseggaanmi ti makipagtrabaho kadakuada iti panangsigurado a ti lokal a puersa ti panagtrabahotayo ket mairaman iti panagregget agraman dagiti lokal a kontraktortayo, ken agtalinaedtayo a sipapanunot kadagiti kultural ken komunidad a prioridad,” kinunana.

“Nangnangruna a bigbigenmi ti kinadagsen ti pannakapukaw idiay Lāhainā, Kula, Olinda, ken ti rikna ti pannakapukaw iti intero nga isla, kasta met ti kinapateg ti panangsigurado a natalged a maaramid ti proseso ti panangtarawidwid kadagiti rugit ken mainaig kadagiti pamilia ken ti katutubo ken multikultural a pakasaritaan dagitoy a komunidad,” kinuna ni Lt. Col. Ryan Pevey, US Army Corps of Engineers, Honolulu District Commander.

“Maipaay ti kauunegan a pakinakemmi iti amin a naapektaran. Bayat ti panagabantetayo, makipagtrabahotayo kadagiti lokal, estado ken pederal a kasosyotayo, dagiti mamalbalakad iti kultura ken komunidad tapno mangbukel iti detalyado a proseso a mangsuporta iti FEMA, ti estado ti Hawai’i ken Maui County,” kinuna ni Lt. Col. Pevey.

Pasingkedan ti USACE ti panagkumitna a mang-aprobetsar iti padas, rekurso, ken outreach-na tapno matulongan dagiti komunidad nga umimbag ken makabangon, ken ipasiguradona kadagiti residente nga awan ti mangrugi a trabaho agingga a saan nga umanamong dagiti residente ken makinkukua iti negosio.

Ti Phase 2 ti pangrugian ti pannakaikkat dagiti rugit ti personal a sanikua apaman nga ikkaten ti ahensia ti US Environmental Protection dagiti napeggad a materiales iti pagtaengan manipud kadagiti naapektaran a lugar. Iti agdama ket maar-aramid ti timeline para iti Phase 2.

Ad-adu pay nga impormasion maipapan iti proseso ti panangikkat kadagiti rugit ti magun-odan babaen ti Maui County kadagiti sumaganad nga aldaw.