Inpakaammo ita nga aldaw ni Mayor Richard Bissen a napili ni Amos Lonokailua-Hewett kas baro nga administrador ti Maui Emergency Management Agency (MEMA), epektibo inton Enero 1, 2024. Iyegna iti posision ti 25 a tawen a panagserbina iti Maui Fire Department (MFD) sakbay nga agretiro inton 2019 kas hepe ti batalyon.

Kas pangulo ti MFD training division, impasdek ni Lonokailua-Hewett ti programa ti Fire Ground Operations idi 2010 ken nagserbi iti siam a tawen kas direktor ti programa a mangpadur-as iti programa ti departamento a “live fire.” Isu ti immuna nga instruktor iti programa ti Blue Card ti Estado ti Hawaii a nangipaay iti sertipikasion ti incident command ken control para kadagiti opisial ti bombero, a nagserbi a direktor ti programa iti walo a tawen. Isu pay ti lead instructor para kadagiti nadumaduma a propesional a sertipikasion a pakairamanan ti Firefighter I ken II, Fire Officer I ken II ken Fire Instructor I ken II.

Isu ket nakaturpos iti Bachelor of Science degree iti Fire Administration idi 2017, ken nakaawat iti Master’s degree iti Public Administration nga addaan iti panangipaganetget iti Emergency Services Management idi 2019 manipud iti Columbia Southern University. Naipasngay idiay O`ahu ken dimmakkel idiay Maui, ni Lonokailua-Hewett ket agdama a presidente ti Waihona Emergency & Training Consultants LLC. Isu ket nagpraktis iti hula iti 32 a tawen ken pormal ken tradisional a nagturpos (uniki) iti sidong ni Loea Frank Kawaikapuokalani Hewett idi 2008 ken nalaing iti pagsasao a Hawaii.

“Nauneg ti panagkumit ni Amos iti pagimbagan ti komunidadtayo. Ti nasaknap a pakasaritaanna iti Maui Fire Department ken ti propesion ti panangtarawidwid iti emerhensia, agraman ti kapadasanna iti sentrotayo nga operating ti emerhensia ti Maui County ket dakkel ti maitulongna iti panangpapigsa kadagiti panagreggettayo iti panangtarawidwid iti emerhensia. Magunggonaan ti Kondadotayo iti panangidaulo, kinalaing ken kinapropesionalna. Segseggaak ti panagsublina iti serbisio publiko kas kangrunaan a kameng ti team-mi,” kinuna ni Mayor Bissen.