Maparegta dagiti umili ti Maui County a mangrepaso ken agkomento iti draft wetlands overlay map ti Departamento ti Panagplano ti Kondado ti Maui bayat ti 30-aldaw a panawen a mangrugi ita nga aldaw agingga iti Mayo 15. Masarakan ti draft iti https://tinyurl.com/57xkpuj2 .

Mausar dagiti komento manipud iti komunidad tapno maileppas ti mapa, a maisubmitir para iti pannakarepaso kadagiti komision ti Panagplano, Konseho ti Kondado ti Maui, komite ti panagplano ti konserbasion ken ti direktor ti Obra Publiko iti saan a naladladaw ngem Hunio 30, 2024.

Ti maudi a mapa ti wetlands ket agserbi a kas maysa nga alikamen ti publiko a makatulong a mangkissay iti peggad ti layus para iti biag ken sanikua ti tao bayat a masalakniban ken maisubli dagiti napateg a natural a wetland ecosystems ti Maui County. Kasta met, makatulong daytoy kadagiti makinkukua iti sanikua, land managers ken county planners kadagiti napateg a pangngeddeng iti panagusar iti daga.

“Paset ti kuleana ti Planning Department ti panangsalaknib ken panangisubli kadagiti wetlands iti Maui County,” kinuna ni Planning Director Kate Blystone. “Daytoy a mapa ti wetland overlay ket agserbi a kas ramit para kadagiti County planners-tayo tapno maikeddeng no sadino ti ayan dagiti wetlands iti Maui, Moloka`i ken Lāna`i – maysa a napateg nga umuna nga addang iti proseso ti panangipalubos ti departamento a mangiturong kadatayo iti konserbasion dagitoy a sensitibo a pagnanaedan.”

Ti Departamento ti Panagplano, ti Unibersidad ti Hawaiʻi Sea Grant Program ken ti konsultant a ni HT Harvey & Associates ket nangangayda kadagiti adu a panagsasarita ken panagbisita ti lugar kadagiti ahensia ken dagiti grupo ti komunidad idiay Maui, Moloka`i ken Lāna`i sakbay nga insaganada ti draft wetlands overlay map. Ti outreach ket paset ti panagregget a mangisubli ken mangsalaknib kadagiti nabasa a daga, a naibalabala iti Maui County Code Chapter 19.47.

Ti draft a mapa ket mangipakita kadagiti agarup a lokasion dagiti nabasa a daga iti intero a kondado ken mairaman dagiti potensial a masakbayan a nabasa a lugar, a naadaw babaen ti panangtingiting kadagiti datos ti pasibo a layus a mangiraman kadagiti epekto ti panagbalbaliw ti klima, a kas ti panagngato ti patar ti baybay.

Ti maudi a mapa ket nairanta nga agbalin a sibibiag a dokumento a mabalin a mabaliwan ken mapasayaat iti panaglabas ti panawen babaen ti kaudian a siensia, ken agtultuloy nga input manipud iti komunidad.

Para kadagiti detalye iti Proyekto ti Panagsubli ken Panangsalaknib kadagiti Wetlands, bisitaen ti www.mauicounty.gov/planning .