Kayat ti Maui Fire Department a paregtaen ti publiko a saan nga agduadua nga umawag iti 911 no makakitada iti gil-ayab, makakita wenno makaangotda iti asuk. Ad-adda a maragsakankami a rummuar ken agsukimat iti kasasaad ken mangaramid iti maitutop nga addang.

Bayat ti napalabas a dua a bulan, adu dagiti kaso a rimsua dagiti babassit nga uram wenno “hot spot” iti lugar ti Upcountry. Dagitoy ket resulta ti agtultuloy nga ag-asuk ti organiko a material iti uneg ti daga manipud kadagiti uram ita nga Agosto. No agtitipon ti organiko a material, pudot, ken oksihena, agtultuloy a sumsumged dagiti babassit nga umas-asuk nga apuy iti uneg ti daga. Dagitoy a babassit a hot spot ket saan a madlaw agingga a rummuarda manipud iti uneg ti daga, a mangpataud iti asuk (wenno angot ti asuk), gil-ayab, ken pudot iti rabaw. Kaaduan kadagitoy a hot spot ket adda iti uneg wenno kabangibang dagiti pilat ti pannakapuor manipud kadagiti uram ita a kalgaw.

Ad-adda a napeggad ti kasasaad no adda iti lugar dagiti basura ti paraangan, pannakapukan ti kayo, mulch, ken troso. Paregtaen ti Maui Fire Department dagiti agtagikua iti pagtaengan a dida ibunton dagitoy a banag iti uneg ti 100 a pie manipud kadagiti estruktura. Nasaysayaat no maipan dagitoy a basura iti maitutop a pasilidad ken maibelleng iti kasta imbes a maibati iti sanikua.

Masarakan ditoy ti listaan dagiti pasilidad ti panagibelleng ti basura ti Kondado ti Maui: https://www.mauicounty.gov/765/Landfill-Information

Mangipaaykami kadagiti tips iti nadumaduma a topiko ti kinatalged ken pananglapped iti uram kadagiti social media site-mi: https://www.mauicounty.gov/2062/Social-Media-Center

Masarakan ditoy ti kanayonan nga impormasion ken tips tapno maisagana ti pagtaengan, sanikua, ken sangakaarrubaan tapno maksayan ti panagbalinna nga uram iti kabakiran: https://www.hawaiiwildfire.org/home