Kas sungbat iti adu a saludsod maipapan iti timeline ken proseso para iti imbestigasion ti federal Bureau of Alcohol, Tobacco, Firearms and Explosives (ATF) iti makagapu ken nagtaudan a report para iti uram iti kabakiran ti Lahaina, itukon ti Maui Fire Chief Brad Ventura ken ti pannakangiwat ti ATF a ni Jason Chudy dagiti sumaganad a sasao:

“Nakipagkita ti County of Maui Department of Fire and Public Safety (MFD) iti ATF iti maudi a lawas ti Hunio tapno repasuenda dagiti detalye ti report ti ATF maipapan iti gapu ken nagtaudan, a nasurok nga 400 a panid,” kinuna ni Chief Ventura idi Hulio 10. “Maysa nga artikulo a naipablaak idi Hunio 28 ti nangidarum a nalpasen ti imbestigasion ti ATF ken ti MFD ket iggemna ti report iti di ammo a kaadu ti panawen. Kayatmi a lawlawagan a saan nga umiso daytoy a sasao, ken adda pay laeng ti ATF a mangileppas iti reportna. Apaman a pormat ti ATF ti reportna, maipatulod ti naileppas a report iti MFD ket inayonmi daytoy kas apendise iti report ti gapu ken nagtaudan ti MFD.

“Bayat a ti departamentomi ket naikkan iti annongen a mangimbestiga iti tunggal uram, agus-usarkami iti ATF tapno tumulong iti ad-adda a komplikado, sientipiko a pananganalisar iti uram,” innayon ni Chief Ventura. “Awan pay ti inted ti ATF iti timeline para iti finalized report-na. Nupay kasta, bigbigenmi ti kinapateg ti panangiranud iti daytoy nga impormasion iti publiko, ken planomi nga iruar ti reportmi a gapu ken nagtaudan apaman a maawat ken maitiponmi dagiti natakuatan ti ATF.”

“Dagiti nabiit pay a komentok iti artikulo ti Civil Beat idi Hunio 28 ket buklen ti impormasion nga adda kaniak iti dayta a tiempo,” kinuna ti pannakangiwat ti ATF a ni Jason Chudy idi Hulio 10. Kalpasan ti makalawas a panangrepaso iti County of Maui Department of Fire and Public Safety, adda kanayonan a panagpormat a kasapulan ti ATF tapno makompleto ti reportmi. Sigagaget nga agtartrabaho ti ATF tapno maileppas ti reportmi, ken apresiarenmi ti anus ti tunggal maysa bayat nga ileppasmi daytoy komprehensibo, napateg ken di mangidumduma nga imbestigasion.”