Indatag ni County of Maui Fire Chief Brad Ventura ti After-Action Report ti Department of Fire and Public Safety maipapan kadagiti uram iti kabakiran ti Maui idi Agosto 2023 bayat ti press conference itay bigat idiay Kula Fire Station.

Inbalabala ni Maui Fire Department (MFD) Chief Ventura, agraman ni Assistant Chief Jeff Giesea, ti sakup ti report, a mangsaklaw iti uppat nga uram iti kabakiran a bimtak idi Agosto 8, 2023, ken nagsaritaanda dagiti rekomendasion, a dadduma kadagitoy ket nangrugin a tamingen ti MFD.

“Gapu iti kolektibo ken bannuar a panagregget dagiti bombero, opisial ti polisia, ken di mabilang a kameng ti komunidadtayo, adu a biag ti naispal idi Agosto walo,” kinuna ni MFD Chief Ventura. “Iti dayta a nakaam-amak nga aldaw, ginasut a tattao ti naispal iti panagregget nga ‘amin nga ima iti kubierta’. . . . Nupay nakaskasdaaw ti panagpannakkelko iti sungbat ti departamentok iti daytoy nga aldaw, patiek a kanayon a makapagtultuloytayo a rumang-ay iti panagreggettayo.”

Kanayon nga aramiden ti MFD dagiti post-incident analyses wenno after-action reports kalpasan ti sumagmamano nga uram. Gapu iti awan kapadana a kadakkel ken sakup ti Agosto 8, 2023, uram iti kabakiran, pinili ti MFD ti Western Fire Chiefs Association a mangisayangkat iti After-Action Report.

Ti report ket mangted lawag iti sungbat dagiti bombero ti Maui bayat ti panaguram ti Olinda, Kula, Pūlehu ken Lahaina, a pinatibker ti napigsa nga angin bayat a limmasat ti Bagyo a Dora iti abagatan dagiti isla.

“Napateg a laglagipen nga idi maikawalo ti Agosto ket napadasanmi saan laeng a ti kadaksan nga uram iti pakasaritaan ti estado -- napadasanmi ti dua a kadadaksan nga uram iti pakasaritaan ti estado, a napasamak iti aggigiddan iti isu met laeng nga isla,” kinuna ni MFD Assistant Chief Giesea. “Ket mapaspasamak dagitoy agraman ti dua pay a dadakkel nga uram — a tunggal maysa kadagitoy no bukbukodda ket maikari koma a pasamak iti damag.”

Dagiti after-action reviews ket inggagara ken sistematiko a panagregget a mangtiliw kadagiti leksion a mabalin a masursuro — agpadpada babaen kadagiti sumungsungbat nga ahensia ken babaen kadagiti serbisio ti emerhensia iti ad-adda a nalawlawa, kinuna ni Assistant Chief Giesea. Mailasinda no ania ti nasayaat ti naglabas ken rumbeng a mataginayon, kasta met nga ibalabala dagiti panagrang-ay a mabalin a maaramid tapno ad-adda a nakasagana a mangtaming iti sumaganad a pasamak.

Dagiti panagregget a mangsungbat ti Lahaina ket mairaman dagiti sumaganad:

• Lablaban dagiti bombero ti uram idinto nga ammoda a mauram dagiti pagtaenganda
• Inispal dagiti bombero dagiti tattao ken pinagtalinaedda ida iti fire truck bayat nga ibakwitda ti dadduma
• Maysa a bombero ti nangi-shuttle kadagiti tattao iti nagbaetan dagiti pagkamangan iti personal a lugan ti bombero
• Maysa nga off-duty Ocean Search Officer ti nangpili nga agmaneho iti adu a daras iti uram ti Lahaina babaen ti moped-na tapno maisalakan dagiti tattao ken maibiahe ida iti natalged a lugar
• Saan a nasarakan dagiti bombero dagiti magun-odan nga alikamen ti bombero isu nga in-stage-da dagiti personal a lugan manipud iti lugar a sumsumged ken nagtarayda a simmang-at iti turod tapno ibakwitda ti kūpuna manipud kadagiti condo

Saklawen ti After-Action Report ti 17 a “karit” a lugar, wenno lugar a mapasayaat, agraman dagiti rekomendasion.

Intampok ni Chief Ventura ti tallo a rekomendasion iti press conference: Naan-anay nga alikamen dagiti relief engine-tayo; mangparnuay iti sistema ti mutual aid iti intero nga estado; ken mangaramid iti plano ti komunikasion tapno maibakwit dagiti bisita nga agsasao iti nadumaduma a pagsasao.

Dagiti rekomendasion a nangrugin a tamingen ti MFD ket mairaman, ngem saan a limitado kadagiti: Pre-positioning personnel para kadagiti pakdaar ti nalabaga a bandera; panangpasayaat iti Ready Set Go messaging-tayo; panangpaadu iti pannakausar ti teknolohia; panangisayangkat kadagiti pasilidad a panangtingiting para iti umdas a pannakapataud ti koriente; panagkiddaw iti updates iti Community Wildfire Protection Plan tayo babaen ti Hawaii Wildfire Management Organization; panangisayangkat kadagiti miting iti FirstNet ken panagkiddaw iti island specific analysis; umad-adu ti panagsanay iti panagbilin ken panangtengngel.  

Saan a matukoy ti “cause and origin” dagiti uram iti daytoy a panawen, gapu ta adda pay laeng iti federal investigation iti Bureau of Alcohol, Tobacco, Firearms and Explosives (ATF), kinuna ni Chief Ventura. Apaman a malpas ti ATF ti imbestigasionna, maited ti intero a report ti imbestigasion kas apendise iti Cause and Origin Investigative Report ti MFD.

Tapno makita ti MFD After-Action Report, bisitaen ti www.mauicounty.gov/fire . Tapno makita ti press conference, bisitaen ti Facebook page ti MFD.