Nagtitipon dagiti canoe paddlers, surfers, kayakers ken swimmers iti intero a Maui idiay Hanaka’ō’ō Beach Park para iti emosional a paddle-out ceremony a nangtanda iti makatawen kalpasan ti makadadael nga Agosto 8, 2023, uram iti kabakiran a nangkettel iti 102 a biag, nangpanaw iti dua a di nakuenta ken nangdadael iti rinibu a pagtaengan ken negosio.

..

Kamaudiananna dimmakkel iti agarup 4,000 a timmabuno, agraman ti agarup 1,000 a nakipaset a napan iti taaw, ti paddle out ti nanglaglagip kadagiti pannakapukaw a sinagaba iti tengnga ti uppat nga uram a bimtak idi napan a tawen. Ti community-inspired, County-supported gathering ita nga aldaw ket nangrugi iti siam a “Kuhinia Maui: Week of Remembrance” nga events nga agtultuloy agingga iti Domingo.

Naisinggalut ti ladingit, lagip ken panagmennamenna iti namnama, pigsa ken kinaandur bayat a nagtakder dagiti umili iti abay ti maysa ken maysa bayat ti bendision ni Kumu Kapono’ai Molitau. Naangay ti espesial a seremonia a nakaitampokan ti pannakaidatag ti ho’okupu (daton) dagiti katutubo a mula manipud Lahaina, a sinaruno ti kanta nga indaton dagiti kameng ti komunidad a mangikarkararag a ti Lahaina ket agbalin manen a berde ken napno kadagiti narangrangpaya, katutubo a bulbulong.

Indauluan ti grassroots advocacy group a da Lahaina Strong ken Maui County Councilmember Tamara Paltin ti paddle out gathering, a tinabunuan da Maui County Mayor Richard Bissen, Hawai'i Gov. Josh Green ken dagiti lider ti kongreso ti Hawai'i US Sen. Brian Schatz, US Sen. Mazie Hirono ken US Rep. Jill Tokuda.

“Makatawen ti napalabas, adu kadakami ti nakarikna nga awan ti maaramidan ken napno iti ladingit no kasano a nagbalbaliw ti biagmi iti maysa a rabii,” kinuna ni Councilmember Paltin. “Ngem sipud idin, nagsilnag ti aloha ken pannakipagriknami para iti amin a Maui. Napateg unay nga agtultuloy ti panagtitinnulongtayo iti pisikal ken emosional. Sangsangkamaysatayo nga agtultuloy nga agpangato.”

Kinuna ni Lahaina Strong spokesperson Pa'ele Kiakona a dagiti uram iti kabakiran ti nangpapigsa iti komunidad.

“Ti nalawag unay a lagip a naikitikitko iti panunotko iti agnanayon ket dagiti aldaw a simmaruno kadagiti uram iti kabakiran. Awan ti nagtugaw iti aglawlaw a maasian iti bagina. Awan ti simmuko ta narigat unay,” kinunana. “Natibkerkami amin kas daytoy a komunidad dagiti Lahaina, uray no silulukat dagiti sugat, ken saankami a nagduadua a nagtitinnulong. Napigsakami, naandurkami, ken awan sardaymi a kas iti init ti Lahaina.”

Napno ti Hannibal Tavares Community Center idiay Pukalani kadagiti residente manipud Kula ken Olinda, dagiti lugar nga immuna a naapektaran iti uram idi Agosto 8, 2023, agraman dagiti dadduma a lugar manipud iti aglawlaw ti isla para iti Upcountry Aloha Luncheon.

Ti nasao nga aktibidad, manipud alas 10 ti bigat agingga agarup alas dos ti malem, ti maikadua a panagtitipon ti Kuhinia Maui. Ni Kumu Cody Pueo Pata ti nanglukat iti Upcountry Aloha Luncheon, nangipabuya ni Shea Derrick iti musika ken nangitukon ni Kaipo Thomas iti pule.

Nagsarita da Mayor Bissen, Gov. Green, Sen. Schatz, Sen. Hirono, Rep. Tokuda, US Army Corps of Engineers Col. Eric Swenson ken Upcountry Councilmember Yuki Lei Sugimura bayat ti nasao nga aktibidad, a nangipaay iti pangngaldaw para kadagiti timmabuno.

Impaganetget ni Sugimura ti aloha nga impakita dagiti kaarruba iti maysa ken maysa ken ti rikna ti namnama a nagbalin a nalawag bayat a mangrugin nga agbangon manen dagiti umili.

“It has been quite a year for our residents, ngem ita nga aldaw ket maysa a panagtitipon para kadagiti tattaotayo, tapno bigbigen ti pudno nga aloha ti komunidadtayo para iti tunggal maysa,” kinunana.

Pinampanunot ni Mayor Bissen ti panagkumit ti county kadagiti umili. “Kayatko a maammuanyo a naikumit ti county nga agtultuloy nga agserbi kadakayo ken tumulong kadakayo nga umimbag. Kayatko ti agyaman kadagiti amin a grupo nga immay ditoy tapno agserbi kadakayo. Pangngaasiyo ta gundawayanyo dagitoy a resources – nangruna ita. Ken agpipinnasinged nga ad-adda. Busbosenyo ti ad-adu bassit a tiempo iti maysa ken maysa.”

“Saan laeng nga Agosto 8 ^th ti nagsagaba, no di ket ti 364 nga aldaw sipud idin,” innayon ni Mayor Bissen.

Ti Kula Community Watershed Alliance ket nangipasdek ti maysa a lamisaan ti impormasion kadagiti rekurso, agraman ti Kula Fire Restoration Project-na. State Department of Health, Aloha House, Mauli Ola ken dadduma pay ket nangitukon kadagiti rekurso ti salun-at ti isip ken emosional a suporta.

Kinuna dagiti timmabuno a therapeutic ti kaadda ti espasio a pagmennamennaan ken pagkonektaan.

Iti malem, ginasut nga umili ti nangpunno iti Lahaina Civic Center tapno makikadua iti One-Year Tribute and Remembrance manipud alas singko agingga alas siete ti rabii

“Maysa a tawenen ti napalabas, nagbaliw ti biagmi iti agnanayon gapu iti di mailadawan a pannakadadael dagiti uram iti kabakiran ti Maui,” kinuna ni Mayor Bissen. “Ket bayat nga inibturanyo ti di mailadawan a panagsagaba, nasaksiak ti di kapapati a kinapinget, sakripisio ken di masukatan a tured manipud iti komunidad a timmakder manipud iti kasipngetan nga orasna.”

“Kadagitoy narigat nga aldaw nga agpasango, ken bayat ti panaglayagtayo iti panagbaba ken panagayus daytoy a panagimbag, mangted iti panawen tapno ipangpangruna ti panangaywan iti bagi,” intuloy ni Mayor Bissen. “Dimo liplipatan nga apresiaren dagiti babassit a banag, bilangen dagiti bendisionmo, idauluan buyogen ti kinaimbag ken makasarak iti liwliwa kadagita a panaggayyem a kaasitgan kenka. Babaen ti nabingbingay a ladingit ken kolektibo a namnamatayo a masarakantayo ti pannakabalin a mangitag-ay iti maysa ken maysa.”

Naluktan ti rabii babaen ti ʻAha Hoʻīnana Ola babaen da Kumu Molitau, Kumu Pata ken Kumu Henohea Kane. Nagsao da Mayor Bissen, Gov. Green ken Federal Emergency Management Agency Administrator Deanne Criswell, a ni Criswell ti nangibinglay iti espesial a mensahe ti Maui manipud ken ni US President Joe Biden.

“Addanto a mismo ti administrasionko a kaduayo tapno matulongannakayo a mangbangon manen,” kinuna ni Biden iti surat. “No sangsangkamaysatayo, dakkel ti naaramidantayo a panagrang-ay iti daytoy idi napan a tawen, ngem adu pay ti aramidentayo. Dagiti tradisionyo ken ti timek dagidiay nangawag iti isla iti pagtaengan iti adu a kaputotan agtultuloyto a mangiwanwan iti trabaho nga umay, ket agtalinaedkami a nakapokus iti panangsuporta iti agtultuloy a panagimbagyo.”

Nagsarita ni Rev. Ai Hironaka ti Lahaina Hongwanji Mission iti pammati ken kinaandur. Nangidatag dagiti agsasao iti komunidad kadagiti mensahe ti pigsa iti 'Ōlelo Hawaiʻi, Ilocano ken Tagalog, Espaniol, Samoano, Intsik, Tongan, Hapones, Vietnamese, Thai ken Ingles. Nagpabuya ni Amy Hanaialiʻi iti entablado sakbay a nakikadua dagiti nakipaset iti emosional ken makapabileg a panangiparang iti “Hawaiʻi Aloha.”

Agtultuloy dagiti panagtitipon ti Kuhinia Maui iti alas 9 ti bigat ti Biernes, Agosto 9, babaen ti Aloha for Kūpuna Luncheon idiay Lahaina Civic Center ken ti konsierto ti Puana Aloha No Lahaina iti alas 6 ti malem, met idiay Lahaina Civic Center. Para iti naan-anay a listaan dagiti pasamak, bisitaen ti www.kuhiniamaui.org .