Mangisayangkat ti Hawai'i Department of Health (DOH) iti needs assessment survey para kadagiti umili a naapektaran iti uram iti kabakiran. Ti surbey ti DOH ket mangtingiting kadagiti agtultuloy a prioridad a nailasin ti komunidad ken dagiti lapped iti pannakagun-od iti healthcare ken dadduma pay a nasken a serbisio.

“Napateg unay a dagiti panagregget ti Department of Health ken dagiti kasosyotayo ket iturturong dagiti kasapulan a nailasin dagiti komunidad ti Maui, ket daytoy a panangtingiting ket makatulong kadatayo tapno ad-adda a maawatantayo dagiti agdama a giwang ken lapped iti panangaywan,” kinuna ti State Epidemiologist a ni Dr. Sarah Kemble. “Ti naurnong nga impormasion ket mausar a mangiturong kadagiti rekurso ti estado ken pederal tapno maipaay dagiti dagus ken kalalainganna a panawen a kasapulan dagiti umili ti Maui kasta met a mangisilpo kadagiti makipaspaset a sangakabbalayan iti aniaman a kanayonan a serbisio a mabalin a kasapulanda ken dida pay nagun-od. Apresiarenmi ti pannakipaset ti komunidad iti daytoy a panangtingiting.”

Tawagan dagiti empleado ti DOH ti random selection dagiti umili ti Maui a naapektaran iti uram iti kabakiran manipud Oktubre 9 agingga iti Oktubre 11. Ti surbey, a pakairamanan ti panagsaludsod babaen ti telepono, ket kurang a 10 a minuto a makompleto ken interamente a boluntario. Makatulong dagiti staff ti DOH iti pannakaileppas ti survey iti pagsasao nga Ilocano, Tagalog, Marshallese, Spanish, ken Hawaiian. Adda met access dagiti staff ti DOH kadagiti interpreter tapno makompleto ti survey kadagiti kanayonan a pagsasao. Masaludsod dagiti napili a sangakabbalayan maipapan kadagiti kasapulanda a rekurso, pannakagun-od kadagiti serbisio a suporta ti salun-at iti medisina ken kababalin, agdama a pisikal a salun-at ken pagimbagan, ken aniaman a lapped a napadasandan iti panagaplay ken panangawat kadagiti serbisio a kasapulanda. Amin a sungbat ti surbey ket kompidensial, ken awan ti personal a pakabigbigan nga impormasion a maurnong.

Babaen ti panagpili ti naiparparna a sample, ti DOH ket makaurnong ti datos a pannakabagi ti naapektaran a populasion iti bassit a makasair a wagas. Daytoy a surbey ket mangipaay iti napateg nga impormasion tapno maiturong ti agtultuloy a trabaho ti DOH ken dadduma pay a kasosyo iti panagsungbat iti emerhensia.

Ti kanayonan nga impormasion kadagiti rekurso a magun-od ti komunidad ti Maui ket magun-od iti https://health.hawaii.gov/mauiwildfires/ .