Ti Kondado ti Maui, a makitinnulong iti Federal Emergency Management Agency (FEMA) ken ti US Army Corps of Engineers (USACE), ket mangipakaammo ti panangrugi ti pannakaikkat dagiti rugit idiay Lahaina a mangrugi inton Martes, Enero 16, 2024. Ti panagtitinnulong a panagregget iti nagbaetan ti Kondado ti Maui, FEMA ken USACE ket panggepna a mapapartak ti pannakaikkat dagiti rugit manipud kadagiti naituding a lugar aginggana idiay Olowalu Temporario a Pagidulin ti Rugit (TDS) a lugar. Ti operasion ket idauluan ti USACE ken kontraktor nga ECC Constructors, LLC kadagiti lugar a nakaturpos dagiti makinkukua iti proseso ti Right of Entry-da.

“Daytoy ket napateg a sumaruno nga addang para ken ni Lahaina, ken agyamanak iti tulong ti adu a kasosio ti gobierno, komunidad ken pribado,” kinuna ni Mayor Richard Bissen. “Napaut ken makakaritto a proseso ngem bayat a siaannad a nabalkot, nabasa ken maiguyod ti tunggal karga ti dapo ken rugit, umasidegtayo iti maysa nga addang a mangbangon manen iti Lahaina.”

Tunggal karga ti trak ket agusar iti “burrito” a pamay-an ti panangbalkot iti natalged a panagempake tapno malapdan ti panagbalin nga angin dagiti rugit ken dapo bayat ti pannakaibiahe. Bayat dagiti operasion a panangikkat kadagiti rugit, mabasa ti material, ket sakbay a maibiahe iti TDS, nabalkot iti napuskol nga industrial a plastik a naselioan babaen ti pigket.

Agayus ken Ruta ti Trapiko:

Dagiti nakargaan a debris truck ket tungpalenda ti naituding a plano ti panagayus ti trapiko para iti episiente ken natalged a pannakaikkat ti material. Ti ruta ket sumurot iti Honoapi'ilani Highway, agturong iti kannigid iti Kapunakea St., kalpasanna agtultuloy iti Front St., sakbay a makikadua manen iti Honoapi'ilani Highway agingga a makadanon iti Lahaina Bypass. Tapno nalaklaka ti naannayas a panaglabas dagiti trak, maipasdek ti manual traffic light iti nagsasabatan ti Lahaina Bypass ken Honoapi'ilani Hwy.

Dagiti Rukod ti Panangtengngel ti Trapiko:

Malaksid iti plano ti trapiko, addanto espesipiko a sistema ti panangtarawidwid iti trapiko para kadagiti indibidual a sumrek iti Olowalu Convenience Center ken para kadagiti trak a bumaba iti turod manipud iti TDS. Dagiti nasanay a flagger ket estratehiko a maikabil tapno maiturong ti trapiko, a mangipasigurado iti naurnos a ruta ti iseserrek ken iruar agpadpada dagiti residente ken dagiti lugan a mangikkat kadagiti rugit.

“Maawatanmi a bayat a mangrugi daytoy nasken nga operasion a panangikkat kadagiti rugit, ti immadu a trapiko dagiti trak kadagiti nagsangaan ket mabalin a mangiparang iti pannakariribuk kadagiti motorista ken umili,” kinuna ni Direktor Shayne Agawa, iti Department of Environmental Management. “Apresiarenmi ti anus ken panagtitinnulong ti tunggal maysa bayat a sursuroten dagiti kontraktor dagiti pamay-an ti panangtarawidwid iti trapiko tapno agtultuloy ti panagayus ti trapiko bayat a mapaadu ti kinatalged iti kalsada.”

Para iti ad-adu pay nga impormasion maipapan iti panangikkat kadagiti rugit, bisitaen ti www.mauirecovers.org/debrisremoval .