Martes, Enero 16 ti umuna nga aldaw ti panagtrabaho para iti panangikkat kadagiti rugit manipud kadagiti sanikua idiay Lahaina, a ti umuna a pagtaengan a sanikua ket naikkat idi kalman idiay Fleming Road. Daytoy a milestone ket simmaruno iti adu a bulan a naurnos nga aktibidad ti panagserrek manen a nangpalubos kadagiti umili a makagun-od iti sitatalged a pannakagun-od kadagiti sanikua iti tunggal sona sakbay a nangrugi ti panangikkat kadagiti rugit.

Ti pannakaikkat dagiti rugit ket maar-aramid babaen ti koordinado a panagregget ti Federal Emergency Management Agency (FEMA), US Army Corps of Engineers (USACE), US Environmental Protection Agency (EPA), Hawaii Emergency Management Agency, County of Maui ken dagiti pribado a kontraktor.

Ti tignay ket mangipasimudaag iti panangrugi ti Phase 2, a dagiti rugit ket maispreyan iti danum ken mabalkot iti napuskol nga industrial plastic sakbay a maibiahe iti Temporary Debris Storage (TDS) site. Kabayatan ti proseso, dagiti Maui-based Native Hawaiian cultural advisors ket makipagtrabaho kadagiti USACE debris removal teams tapno mamonitor ken mangipaay iti giya kadagiti kultural a prioridad.

“Ti panangrugi ti pannakaikkat dagiti rugit ket kritikal a milestone iti panagrang-aytayo, ken napateg nga addang nga agturong iti sango,” kinuna ni Mayor Bissen. “Apresiarenmi ti napinget a panagtrabaho dagiti public works crews-mi, US Army Corps of Engineers ken kontraktor. Bayat nga umad-adu ti operasion kadagiti sumaganad nga aldaw, addanto dagiti grupo a mangisayangkat iti panangikkat kadagiti rugit iti adu a sanikua nga aggigiddan. Tunggal maysa ket agtartrabaho a sipipinget iti daytoy a proseso ti panagdalus tapno matulongan dagiti taga-Lahaina ken dagiti makinkukua iti daga nga agsubli kadagiti sanikuada.”

Ti pannakaikkat ti napeggad a material iti pagtaengan ken bulk asbestos material ket nakompleto ti USACE bayat ti Phase 1 ti debris removal mission.

Para iti ad-adu pay nga impormasion maipapan iti panangikkat kadagiti rugit, bisitaen ti www.mauirecovers.org/debrisremoval .