"Apresiarenmi unay ti anunsio ti Komar Maui Properties a mangidonar iti lima nga ektaria; nupay kasta, ti napaut a planomi a landfill ket kasapulanna ti naan-anay a 20 nga ektaria para iti MSW landfill para kadagiti umilitayo," kinuna ni Mayor Richard Bissen. “Agtalinaed a situtulok ti Kondado a mangbayad iti napattapatta a pateg tapno magun-od daytoy a parsela tapno mataming ti kasapulan dagiti tattao ti Lahaina ken ti napaut a kasapulan dagiti umilitayo.”

“Ti panggep ni Komar a mangipaay iti donasion a lima nga ektaria kadagiti 20 nga ektaria idiay Pulehu ket umay bayat nga adda ti Kondado iti proseso ti panangaramid iti eminent domain action. Daytat’ kontribusion a mangbigbig a ti panagabante iti kasapulan unay a permanente a disposal site ket kritikal,” kinuna ni Mayor Bissen.

Ti panangsurot iti 20-acre a parsela ket paset dagiti plano ti panagpalawa a mangpadur-as iti Central Maui Landfill (CML) para iti Municipal Solid Waste (MSW), ken ti naganat a panagkasapulan iti Permanent Disposal Site sigurado a nangpapartak kadagiti negosasion a nagngudo babaen ti eminent domain action nga inaramid ti Maui County Council idi napan a Biernes.

Bayat nga insingasing ti Komar ti pribado a kukua ken patarayen a pagibellengan iti basura iti 15 kadagiti 20 nga ektaria, ituloy ti Kondado ti kasayaatan nga atiddog a plano para kadagiti umili.

“Bayat a maawat ti donasion a lima nga ektaria, plano ti Kondado a mangusar iti 8-10 nga ektaria para kadagiti rugit ken dapo ti Lahaina,” kinuna ni Department of Environmental Management Director Shayne Agawa. “Ti planomi ket agkasapulan iti ad-adu nga ektaria tapno masigurado nga agtalinaed a nababbaba ti kangato ti dapo ngem ti kangato ti Pulehu Road. No ikabiltayo amin a rugit iti lima nga ektaria, mangpataud dayta iti bantay a mangibutaktak iti dapo kadagiti elemento, ken mangpataud iti mabalin a peggad iti kinatalged ti publiko.”

Inlawlawag ni Direktor Agawa a no panggep ti Komar nga usaren ti naan-anay a 15 nga ektaria para iti pribado a pagibellengan, kasapulanda ti kalintegan a makastrek babaen ti Central Maui Landfill, a mangpataud iti dakkel a sungsungbatan ken isyu iti operasion.

Ti Kondado ket agtultuloyto babaen dagiti probision nga inted ti Proklamasion ti Emergency ti Gobernador tapno mapapartak ti panagdur-as ti Permanent Disposal Site (PDS); dagitoy a probision ti emerhensia ket saan a mayakar kadagiti pribado a kompania.