Dagiti umili ti Freely Associated States, a kolektibo a pagaammo kas umili ti COFA, a dagiti kangrunaan a pagnanaedanda idiay Maui ket naapektaran kadagiti uram iti kabakiran ken napigsa nga angin iti Agosto ket mabalin itan nga agaplikar para iti tulong ti FEMA iti didigra.

Nabiit pay a pinirmaan ni Presidente Biden a nagbalin a linteg ti Compact of Free Association Amendments Act of 2024, a mangpalawa kadagiti pederal a benepisio kadagiti umili ti COFA a dati a saan a maikari nga agaplikar iti tulong ti FEMA, agraman dagiti grant. Karaman kadagitoy dagiti umili ti Republika ti Palau, dagiti Pederato nga Estado ti Mikronesia ken ti Republika ti Is-isla Marshall.

Naluktan ti disaster application period ti FEMA idi Lunes, Abril 1, kadagiti laeng umili ti COFA a legal nga agnanaed iti Estados Unidos ken addaan iti kangrunaan a pagtaengan idiay Maui a naapektaran iti uram iti kabakiran. Agserra ti application window para kadagiti umili ti COFA inton Biernes, Mayo 31.

Tapno makaaplay, mabalin nga umawag dagiti umili ti COFA iti 808-784-1952 wenno bisitaen ti Lahaina Disaster Recovery Center iti Civic Center Gymnasium iti 1840 Honoapi'ilani Highway. Dagiti linya ti telepono ken oras ti recovery center ket alas 8 ti bigat agingga alas 4 ti malem HST Lunes agingga Biernes; 8 ti bigat agingga alas 2 ti malem HST Sabado; agserra iti Domingo.

Agaplikar man dagiti umili ti COFA babaen ti telepono wenno iti Disaster Recovery Center, adda dagiti agipatarus a tumulong kadagiti aplikante kadagiti kaykayatda a pagsasao, agraman ti Marshallese, Chuukese, Kosraean, Palauan, Carolinian, Chamorro ken American Sign Language.

Adda met dagiti espesialista ti Disaster Survivor Assistance ti FEMA iti Maui a tumulong kadagiti umili ti COFA nga agaplikar iti tulong ti FEMA.

..