Ti artwork dagiti estudiante a nangarkos iti 1,000 a lineal feet ti mesh barrier fencing idiay Lahaina ket naikkat idi napan a lawas tapno adda lugar para iti sewerline project a mangsuporta kadagiti interim housing units ken 29 a pagtaengan iti Fleming Road, inwaragawag ti County of Maui. Ti obra ti arte ket naikabil iti pagipempenan para iti masanguanan a pannakausar, agraman ti pannakaipasdek idiay Lahaina Civic Center iti maudi a paset daytoy a tawen.

Ti arte ket kinomision idi arinunos ti napalabas a tawen babaen ti nonprofit a Maui Public Art Corps, a nakilanglangen kadagiti nasurok a 900 nga estudiante iti intero a Maui tapno mangparnuay iti artwork tapno maipaawat ti kinaandur ken mangitandudo iti komunidad, kinuna ni Erin Wade, Planning and Development Chief ti County of Maui Department of Management.

Idi napan a Disiembre, nayimprenta ti arte iti 1,000 a lineal feet a dust fencing babaen ti Maui Public Art Corps babaen ti suporta ti Hawai'i Community Foundation. Ti Departamento ti Transportasion ti Estado ket nangitukon ti Honoapi'ilani Highway a kabangibang ti kaarrubaan ti Wahikuli a kas maysa a lugar a nalatak a mangiparang ti arte dagiti estudiante. Babaen ti tulong ti Goodfellow Bros. ken ‘Āina Archaeology, naikabil dagiti 20’ x 8’ a panel iti igid ti haywey.

“Ti displey ti arte dagiti estudiante ket napateg a wagas a mangibinglay kadagiti makapapanunot, makaparegta, makaladingit ken nabileg a panangmatmat kadagiti agtutubo ti islatayo,” kinuna ni Kelly White, Chair ti Maui Public Art Corps. “Gapu ta siaannad a naikkat tapno adda lugar dagiti proyekto ti imburnal ken balay, agtalinaed a natalged a maidulin dagiti panel agingga a mausar iti masanguanan kas simbolo ti kinaandur, panagkaykaysa ken kari ti naraniag a masakbayan.”

Para iti ad-adu pay nga impormasion maipapan iti Maui Public Art Corps, bisitaen ti https://www.mauipublicart.org/ .