Inpakaammo ni Mayor Richard Bissen ita nga aldaw ti pannakapili ni John Smith, maysa a seasoned a lider iti Department of Public Works (DPW) ti County of Maui, nga agserbi kas baro nga administrador ti County’s Office of Recovery. Ni Smith, a nakatulong iti panangidaulo kadagiti panagregget a mangisubli iti imprastruktura kalpasan dagiti nabiit pay nga uram iti kabakiran, ket mangimaton itan kadagiti komprehensibo a panagregget ti Kondado iti panagsubli.

Iti nabiit pay a nagserbi a kas Hepe ti DPW Highways Division, ni Smith ket mangyeg iti nasurok a dua a dekada a kapadasan iti disenio ken panagmantener ti imprastruktura, 12 kadagita a tawen iti Kondado ti Maui. Ti nasaknap a pannakaammona kadagiti trabaho publiko ken panagsubli iti didigra ket naisangsangayan a mangkualipika kenkuana a mangiwanwan kadagiti panagregget ti Kondado a panagsubli iti panaglabas dagiti makadadael nga uram ti kabakiran idi Agosto 2023.

“Ni John Smith ket maysa a napadasan, dedikado nga inheniero ken napaneknekan a lider iti Public Works Department-tayo,” kinuna ni Mayor Richard Bissen. “Ti kinalaingna iti imprastruktura ken natibker a singgalutna iti daytoy a komunidad ti mamagbalin kenkuana a nasayaat a tao a mangidaulo iti Office of Recovery bayat ti panagtitinnulongmi a mangbangon manen iti Lahaina ken Upcountry. Agyamyamankami iti kinatulokna nga agtakder iti daytoy napateg nga akem iti kasta a kritikal a tiempo.”

Ni Smith ti mangsuno ken ni Managing Director Josiah Nishita, a temporario a mangidadaulo iti Office of Recovery agingga a ti permanente nga administrador ket napili babaen ti maysa a komite ti panagpili.

Ti akem ti Office of Recovery Administrator ket napateg iti panangkoordinar kadagiti panagregget ti Kondado iti panagsubli. Impatakder ni Mayor Bissen idi Setiembre 19, 2023, ti Opisina ket mabirukan iti sidong ti Departamento ti Panagmanehar ti Kondado ken mangimatmaton iti innem a kangrunaan a Recovery Support Functions (RSFs): Panagplano ti Komunidad, Panagsubli ti Ekonomia, Salun-at ken Serbisio ti Sosial, Balay, Imprastruktura, ken Natural ken Kultural a Rekurso. Ni Smith ti responsable iti estratehiko a direksion ken pannakaipatungpal dagiti gannuat ti panagsubli ti Kondado.

Kas ti Hepe ti Dibision ti Haywey ti DPW, ni Smith ket nangiturturong kadagiti amin nga operasion ti haywey ken nangited ti panangimaton para kadagiti badyet ti personnel ken programa. Kasta met, nagserbi a co-lead para iti Opisina ti Panagsubli, Infrastructure Recovery Support Function.

Naggapu idiay Ohio, ni Smith ket nakagun-od ti bachelor's degree na iti civil engineering manipud iti Ohio University. Kalpasan ti panagakar idiay Maui, isu ket nakikadua iti grupo ti Public Works ti Kondado ti Maui idi 2012. Idi 2015, ni Smith ket nabigbigan babaen ti premio ti Empleado ti Tawen ti Obra Publiko para kadagiti naisangsangayan a kontribusionna iti departamento.

Agnanaed ni Smith ken ti pamiliana idiay Upcountry, a sadiay aktiboda a kameng ti komunidad.