Maawis ti publiko a mangammo iti ad-adu pay maipapan iti pannakayakar ti dapo ken rugit ti uram ti Lahaina manipud iti temporario a pagipempenan idiay Olowalu agingga iti Permanent Disposal Site idiay Central Maui bayat ti open house inton Sabado, Pebrero 15, 2025, iti Lahaina Resource Center ti County of Maui.

Mabalin nga ag-drop in dagiti residente manipud alas 10:30 ti bigat agingga alas 1 ti malem iti sentro, a masarakan iti Lahaina Gateway Center iti asideg ti Ace Hardware.

Adda dagiti pannakabagi manipud iti Kondado, US Army Corps of Engineers (USACE), Departamento ti Salun-at ti Estado ti Hawaiʻi ken Ahensia ti Pannakasalaknib ti Aglawlaw ti Estados Unidos (EPA). Magun-odto dagiti estasion ti impormasion kadagiti plano ti operasion, eskediul ti transportasion ken pannakaserra ti Temporary Debris Storage (TDS) site idiay Olowalu.

Ti desision a mangyakar iti napattapatta nga 400,000 a yarda kubiko ti dapo ti Lahaina ken dagiti saan a ma-recycle a rugit ti uram ket naaramid kalpasan ti dakkel nga input manipud iti komunidad ken dadduma pay a nangipamatmat a ti lugar ti Olowalu ket rumbeng a temporario a pagipempenan. Maibangon ti permanente a lugar para kadagiti rugit ken dapo manipud Lahaina iti daga nga asideg iti Central Maui Landfill.