Nairuar ita nga aldaw ti Origin and Cause Report

Ti County of Maui Department of Fire and Public Safety (MFD), babaen ti tulong ti United States Bureau of Alcohol, Tobacco, Firearms and Explosives (ATF), ket nangiruar ita nga aldaw iti Origin and Cause Report-na para iti uram idiay Lahaina idi Agosto 8, 2023.

Ti uram, a nangkettel iti di kumurang a 102 a biag ken nakaigapuan ti dakkel a pannakadadael iti intero a Lahaina, ket naikeddeng a maysa nga uram nga addaan iti maymaysa a nagtaudan ken gapu a nagtultuloy iti dua a naiduma a paset (agsapa a paset ti uram ken malem a paset ti uram) iti intero nga insidente. Iti alas 6:34 ti bigat, nagtaud ti uram iti igid ti Lahainaluna Road iti di matartaripato a mulmula iti asideg ti utility pole 25 kas resulta ti narunaw a metallic material (sparks) a nairuar manipud iti re-energization dagiti naburak a linya ti koriente iti ngato. Daytoy a paset ti uram iti agsapa ket natengngel sakbay ti alas 9:00 ti bigat Impakita amin a magun-odan a mangipamatmat a naan-anay a natengngel ken naiddep ti uram—awan ti napaliiw a gil-ayab, awan ti asuk, wenno madlaw a mauram a material iti sumagmamano nga oras.  

Iti laksid ti napinget a panangmonitor iti lugar ti uram ken pannakaipakat dagiti napateg a rekurso, nagtalinaed a di naduktalan dagiti embers manipud iti morning phase ti uram ken nasindi manen gapu iti nakaro nga angin iti agarup 2:52 pm, a nangtanda iti panangrugi ti malem a paset ti uram.

“Iti pakagupgopan, nalawag ti nagtaudan ken makagapu iti uram ti Lahaina: ti pannakapabileg manen dagiti nadadael a linya ti koriente ti nakaigapuan dagiti sparks a nangsindi kadagiti di nataripato a mula iti lugar,” kinuna ita nga aldaw ni MFD Chief Brad Ventura bayat ti press conference iti pasdek ti Kalana O Maui sadiay Wailuku.

“Kayatmi nga ilawlawag a nawadwad iti komunidad a dagiti bomberomi ket nagaramidda iti ngato ken iti labes ti maiparbeng a kinagagetda tapno agtalekda agingga a mabalinda a naan-anay a naiddep ti uram sakbay a pimmanawda iti lugar,” kinuna ni Assistant Chief Jeffrey Giesea.

Naklase ti uram kas Aksidente—kas maisupadi iti Incendiary, Natural, wenno Undetermined.

Kaduana da Chief Ventura ti MFD ken Assistant Chief Giesea, ni Jonathan Blais, Special Agent in Charge ti ATF Seattle Field Division, ti nagsao iti press conference.

Ti Origin and Cause Report ket resulta ti naballigi a panagtitinnulong iti Honolulu Field Office ti ATF, Seattle Field Division ken ti National Response Team-na, a nangitukon iti awan kaaspingna a lebel ti kapadasan, state-of-the art nga alikamen ken kualipikado unay a personnel. Tinulongan dagiti ATF personnel ti MFD iti panagkolekta iti datos, panaganalisar iti retrato ken video, ken panaginterbiu kadagiti saksi bayat dagiti lawas kalpasan dagiti uram. Kalpasanna, pinagtitipon ken inanalisar ti ATF dayta nga impormasion kas pangibatayan kadagiti agwaywayas a natakuatanna ken konklusionna, kasta met ti elektrikal a panangsukimatna, a naikapet iti report ti MFD. Inbinglay ti ATF ti amin a datos ken panaganalisar iti MFD, malaksid iti elektrikal a datos, nga impaay laeng ti kompania ti utilidad iti ATF segun iti katulagan iti saan a pannakaipablaak ken kinakompidensial. Gapu ta saan a naikkan ti MFD iti access iti daytoy a de koriente a datos, agpannuray daytoy kadagiti natakuatan ti ATF a naibatay kadagita a material.

Kalpasan ti umuna nga imbestigasionna kadagiti lawas kalpasan ti Agosto 8, 2023, nagsubli ti ATF iti lugar ti uram para iti kanayonan nga imbestigasion idi Abril ken Mayo 2024. Idi Hunio 2024, nakipagkita ti ATF iti MFD tapno repasuenda ti sumagmamano a detalye ken natakuatan iti umuna a draft report-na. Nagsubli ti ATF iti lugar ti uram idi arinunos ti Hulio 2024 ken nasapa nga Agosto 2024 para iti kanayonan a site visit ken interbiu bayat ti panangileppasna iti reportna. Naited ti draft iti MFD idi Sept. 23, 2024, nga addaan iti briefing iti MFD idi Sept. 25, 2024.

Manipud iti alas 1 ti malem, ti naan-anay nga MFD-ATF Lahaina Fire Origin and Cause Report ket mabalin a masarakan iti website ti Kondado ti Maui, https://mauicounty.gov/1460/Fire-Public-Safety , ken ti website ti ATF, https://atf.gov .

Ti Origin and Cause Report ket naited kadagiti redactions tapno masalakniban ti kinapribado dagiti indibidual nga imbestigador ken saksi, maibatay kadagiti linteg ken pagannurotan ti estado ken county, ngem tapno maraem met ti panagtalek nga inted iti MFD ken ATF dagidiay nangitukon kadagiti personal nga estoria ken impormasionda a mangsuporta iti daytoy a report.

“Mahalo iti team manipud iti ATF gapu iti panangiyegda iti kinalaingda idiay Maui tapno matulongandakami iti nasaknap nga imbestigasion iti uram,” kinuna ni Mayor Richard Bissen. “Ginasut nga oras ti staff ti indedikarda iti panagkolekta ken panangrepaso kadagiti ebidensia tapno maipaayankami iti komprehensibo a report.”

Tapno makita ti naan-anay a press conference, bisitaen ti County of Maui Facebook page.

..