Ti County’s Maui Emergency Management Agency (MEMA) ket idagdagadagna kadagiti umili ken bisita ti Lahaina a raemenda dagiti addang ti kinatalged babaen ti panangliklik kadagiti nainget a lugar iti ili ti Lahaina.

Dagitoy a lugar ket namarkaan kadagiti karatula a “Dika Sumrek,” ken ti di autorisado a iseserrek ket buklen ti panaglabsing, a maipatungpal babaen ti linteg. Nabilin kadagiti security personnel a nakontrata iti county nga ireportda ti aniaman a panaglabsing.

Adu ti naawat ti MEMA a report maipapan kadagiti lugan a nakaparada iti pribado a sanikua wenno kadagiti pribado a lote. Kasta met, adda dagiti report a di ikankano dagiti indibidual dagiti karatula ken sumrekda kadagiti di natalged, nainget a sona.  

“Bayat nga adu a lugar ti agtalinaed a madanon, napateg a laglagipen nga adu a sanikua ti pribado a kukua,” kinuna ni MEMA Administrator Amos Lonokailua-Hewett. “Sararaem a kiddawenmi iti tunggal maysa a padayawanda dagiti naipaskil a karatula ken barikada a manglapped kadagiti di natalged a lugar. Napateg ti panagtitinnulongyo tapno masigurado ti kinatalged ken panagraem iti amin.”

Maiparparegta kadagiti pribado a makinkukua iti sanikua nga ireportda dagiti insidente ti panaglabsing iti non-emergency line ti Maui Police Department iti (808) 244-6400.