Inpakaammo ita nga aldaw ti County of Maui Emergency Management Agency (MEMA) nga intedna ti 4-tawen a kontrata iti Genasys Inc. (NASDAQ: GNSS), tapno maipaayan ti ahensia iti dua a plataporma ti software ti kinatalged ti publiko ken panagmanehar iti emerhensia: Genasys EVAC (EVAC) ken TRAFFIC AI babaen ti Ladris (TRAFFIC AI).

Maipakat ti teknolohia iti ballasiw ti amin nga isla iti Maui County ken mangipaay iti nalaka a maibagay a panagplano iti evacuation zone, artificial intelligence (AI)-powered traffic modeling, multi-threat planning ken modeling ken emergency alert mobile app.

“Ti kontrata ti MEMA iti Genasys ket mangmarka iti dakkel nga addang nga agturong iti panagreggettayo a mangpasayaat iti panagsagana iti didigra ken panangtarawidwid iti emerhensia iti Maui County,” kinuna ni Mayor Richard Bissen. “Dagitoy a narang-ay nga alikamen iti panagplano ken komunikasion ti mangipalubos kadatayo a mangsungbat a sieepektibo kadagiti masanguanan nga emerhensia, agraman ti panangaramid kadagiti desision iti panagbakwit a maiturong babaen ti datos.”

Agus-usar ti EVAC kadagiti nasaririt a sona tapno napartak a mailasin dagiti eksakto a lugar a pagbakuit, isu a makaawat ti publiko kadagiti nalawag a pakaammo ken pakdaar, agraman dagiti pannakapabaro ti panagbakwit ken pagkamangan iti lugar. Babaen ti Genasys Protect mobile app, makaawat dagiti umili kadagiti pakaammo a naibatay iti lokasion tapno agtalinaedda a natalged ken naammuan no adda emerhensia.

Ti TRAFFIC AI ket mangkomplemento iti EVAC babaen ti panangipaay iti aktual nga oras a datos ti trapiko ken analytics. Daytoy a panagtipon ket mangpabalin kadagiti manager ti emerhensia a nasaysayaat a mangkoordinar kadagiti panagbakwit, a mangsigurado a dagiti ruta ket nalawag ken natalged para kadagidiay kasapulan a napardas a pumanaw kadagiti naapektaran a lugar.

“Mapagpannakkelmi ti makikadua iti MEMA tapno iyeg ti bileg ti Genasys Protect idiay Maui,” kinuna ni Richard Danforth, CEO ti Genasys Inc. “Ti panggepmi ket mangipaay kadagiti narang-ay nga alikamen a mangpasayaat iti kinatalged ti publiko ken siguraduen nga umawat dagiti umili ken bisita iti naintiempuan ken umiso nga impormasion bayat dagiti emerhensia. Ti pannakaited daytoy a kontrata ket pammaneknek iti panagkumitmi a mang-aprobetsar iti teknolohia para iti dakdakkel a pagimbagan.”

Dagiti plataporma ti EVAC ken TRAFFIC AI ket agdama a naipakat iti ballasiw dagiti nadumaduma a rehion idiay Estados Unidos, a mairaman idiay California, Oregon, Colorado, Arizona, New Hampshire, ti Siudad ti Boston, ken dagiti dadduma pay a lokasion.

Kinuna ni MEMA Administrator Amos Lonokailua-Hewett a manamnama a mangrugi ti pannakaipakat ti EVAC ken TRAFFIC AI iti Maui County inton Enero 2025, kalpasan ti naannad a panangrepaso ti adu a first responder agencies.

“Dagiti kangrunaan a maseknantayo – dagiti fire, police, dispatchers, state partners ken adu pay – ket mangipaay iti input kadagiti umuna nga evacuation zones a parnuayen ti software para iti tunggal lugar,” kinuna ni Lonokailua-Hewett. “Ti nauneg, lokal a pannakaammoda ti mangpaadu iti teknolohia, ken makatulong kadatayo nga agsagana a mangipakat kadagiti real-time nga alikamen ti komunikasion.”

Kas paset ti 4-tawen a kontrata, suportaran ti Genasys ti MEMA babaen ti panagsanay ken teknikal a tulong tapno masigurado a mausar dagiti sistema iti naan-anay a potensialda.

Tapno maammuan ti ad-adu pay maipapan iti Genasys EVAC, bisitaen ti https://genasys.com/genasys-evac/ . Para iti ad-adu pay nga impormasion maipapan iti MEMA, bisitaen ti https://www.mauicounty.gov/mema .