Naangay ti bendision idi Biernes iti umuna a pagtaengan a naibangon manen ken nakapasa iti amin a maudi nga inspeksion iti Lahaina Disaster Area, a mangtanda iti maysa a milestone iti panagregget a mangpaimbag sipud idi Agosto 2023 nga uram ti Lahaina.

Dagiti umili ti Lahaina a da Mau ken Ariel Ah Hee ken ti dua nga agtutubo nga annakda a lallaki ket planoda ti umakar ita a bulan iti tallo ti kuarto, dua ti baniona a pagtaengan, a nakapasa kadagiti maudi nga inspeksionna iti agsapa ti Biernes. Kalpasan a nakagun-od iti building permit babaen ti County of Maui Recovery Permit Center a mangitukon iti napardas nga emerhensia a permit para kadagiti pagtaengan a naapektaran iti uram, nangrugi ti pannakaibangon ti 1,200-square-foot a pagtaengan idi Hulio.

Kabayatan ti bendision, kinuna ni Ariel Ah Hee nga isu ken ti pamiliana ket agyamyaman ken naparaburan nga umakar manen iti pagtaenganda.  

“Diak kayat a daytoy nga aldaw ket maipapan laeng kadakami,” kinunana iti bassit a panagtitipon dagiti gagayyem, pamilia ken media. “Adda atiddog a listaan dagiti tattao nga agyaman . . . amin dagiti tattao a nagboluntario a tumulong, amin a tattao a nagdonar kadakami, ken iti intero a komunidad ti Lahaina, saankami koma nga adda ditoy no awankayo. Agyamankami iti labes ti sasao.”  

Agarup innem a bulan ti kasapulan tapno maibangon manen ti pagtaengan ti pamilia, sigun ken Ariel Ah Hee Agarup dua a bulan ti kasapulan dagiti permit ken uppat a bulan ti panagibangon iti lokal a kontraktor a ni Derrick Montalvo.  

“Awan idi ti ideyak a kastoy ti kapartak dayta,” kinuna ni Ariel Ah Hee. “Pampanunotek idi di kumurang a dua agingga iti tallo a tawen. Naatap ti kinapudno nga addakami ditoy sakbay ti Thanksgiving . . . Intultuloymi laeng ti nagkiddaw iti tulong ket amin dagitoy a tattao ket tumultulong kadakami. Adu unay dagiti resources sadiay ruar.”  

Adda ni Mayor Richard Bissen iti pagtaengan iti Komo Mai Street idi malem ti Biernes tapno kablaawanna ti pamilia Ah Hee sakbay ti bendision ni Kumu Kaponoʻai Molitau, direktor ti County Office of ʻŌiwi Resources.

“Daytoy ti umuna nga addang iti panagawid dagiti tattaotayo idiay Lahaina,” kinuna ni Mayor Bissen. “Agyamanak unay ta nasapsapa a mapaspasamak daytoy a napateg ngem iti ninamnamatayo. Daytat’ pammaneknek iti espiritu ti kinaandur a nabatad idiay Lahaina ken ti dedikado a trabaho ti adu, agraman dagiti kasosyotayo iti pederal ken komunidad, kasta met ti di agkupas a panagkumit ti komunidadtayo. Sangsangkamaysa nga impakitami a babaen ti panagkaykaysa ken determinasion, malabsanmi ti namnamaenmi.”  

Kinuna ni Molitau a dagiti Ah Hee 'ohana, a nabayagen a singgalutda iti West Maui, ket nabigador ken waʻa a tattao. Ti ama ni Mau, ni Abraham “Uleg” Ah Hee, ket maysa kadagiti orihinal a tripulante ti Hōkūleʻa.  

“Napateg unay dagita a nagan agingga ita,” kinuna ni Molitau. “Kitaenmi daytoy a pagtaengan kas hoku paʻa, kas bituen iti amianan, a no lumabas ti amin, maysa dayta a parola ti namnama, parola ti palagip nga adda baro a panagdur-as.”  

Manipud idi agsapa ti Biernes, nangipaulog ti Recovery Permit Center iti nasurok a 254 a building permit ken nasurok a 120 a pagtaengan ti maibangbangon manen kadagiti lugar a naapektaran iti uram ti Lahaina ken Kula. Adda 264 nga aplikasion ti permit a marepaso.  

Kinuna ni Ariel Ah Hee bayat ti bendision a ti kadakkelan a balakadna kadagiti dadduma nga agtagikua iti sanikua nga agsapsapul a mangbangon manen ket ti maaddaan iti nasayaat a relasion iti kontraktor, elektrisian ken tuberoda.  

“Siguraduem nga agtalekka kadakuada ken makisaritaka kadakuada,” kinunana.  

Ti panagbangon manen ket maar-aramid babaen ti proseso ti emerhensia a permiso ti panagbangon ti Kondado ti Mauiʻs, a naipaulog idi Marso 11, 2024, babaen ti Ordinansa 5629. Ti proseso ti emerhensia a pammalubos ti panagbangon ket iturturayan babaen ti Administrasion ti Serbisio ti Panagrang-ay (DSA) iti sidong ti Departamento ti Obra ti Publiko ti Kondado. Nakikontrata ti DSA iti 4Leaf Inc. a mangpaandar iti proseso ti emerhensia a building permit ken ti dua a Recovery Permit Centers ti County, a ti umuna kadagitoy ket nalukatan idiay Kahului idi Abril 29, 2024. Indauluan ti DSA ti koordinasion kadagiti ahensia a mangipalubos iti County ken Estado tapno maurnos ken mapasayaat dagiti kasapulan ken pamay-an ti permiso tapno mapalubosan ti naballigi a pannakaipatungpal ti proseso ti emerhensia a permiso ti panagbangon.  

“Ti pannakasaksi iti umuna a nalpas a pannakaibangon manen idiay Lahaina ket dakkel a gapuanan ken milestone para iti intero a komunidad,” kinuna ni Jennifer Gray Thompson, CEO ti nonprofit nga After the Fire USA, a mangsupsuporta kadagiti komunidad nga agpapaimbag manipud kadagiti uram iti kabakiran. “Napateg unay para iti komunidad a makita dagiti visual deliverables ti panagrang-ay ken namnama. Ti megafire ti Maui ti karikut a didigra a nagtrabahoak, ket dakdakkel ti irarang-ay ngem iti ninamnama iti daytoy a kanito. Ti puso ken kablaawmi ket adda iti pamilia Ah Hee. Sagut ken responsabilidad ti agbalin nga umuna a lawag kalpasan ti nasipnget unay ken narigat a panawen.”

..