Kitaen ti draft iti MauiRecovers.org; open houses a maangay inton Okt. 23 ken 26

Magun-od ti draft ti Long-Term Recovery Plan ti County of Maui para iti Lahaina mangrugi inton Lunes, Oktubre 21, 2024 para iti online viewing ken feedback ti publiko iti www.MauiRecovers.org/lahaina . Magun-od itan ti pakabuklan ti draft plan iti www.MauiRecovers.org/lahaina tapno matulongan ti publiko a makaammo maipapan iti plano.

..

Ti draft Long-Term Recovery Plan ket buklen ti 29 a kangrunaan a proyekto ken 11 nga apendise a proyekto a mangsaklaw kadagiti kangrunaan a lugar ti panagsubli: Panagplano ti Komunidad, Panagsubli ti Ekonomia, Serbisio ti Salun-at ken Sosial, Balay, Imprastruktura, ken Natural ken Kultural a Rekurso.

Malaksid iti online feedback opportunity, maawis ti komunidad ti Lahaina a tumabuno kadagiti open houses inton Mierkoles, Okt. 23 manipud alas 4 agingga iti alas 7 ti malem, ken inton Sabado, Okt. 26, manipud alas 11 ti bigat agingga alas 2 ti malem Dagiti in-person events ket mangipalubos kadagiti residente a mangammo maipapan kadagiti proyekto babaen kadagiti informational boards ken mangipaay iti feedback. Mabalinto dagiti opisial ti county para kadagiti saludsod maipapan kadagiti bukod a proyekto ti departamentoda. Agpada a maangay ti open house iti kapeteria ti Lahainaluna High School. Maawis ti publiko nga agsardeng iti aniaman nga oras bayat ti tallo nga oras a tawa; awan ti maangay a pormal a presentasion.

Mausar ti feedback manipud iti online questionnaire ken in-person open houses a mangipakaammo iti maudi a Long-Term Recovery Plan, a mairuar inton ngudo ti tawen. Napateg a laglagipen a ti Long-Term Recovery Plan ket maysa a sibibiag a dokumento ken silulukatto kadagiti pannakabalbaliw iti panaglabas ti panawen no kasapulan.

“Iti panaglabas ti makadadael a pannakapukaw ti ilitayo, daytoy a plano ti panagsubli ket irepresentarna saan laeng a dalan nga agturong iti sango, no di ket maysa a kolektibo a sirmata para iti masakbayantayo,” kinuna ni Mayor Richard Bissen. “Napateg unay a mangngeg ti tunggal timek ti Lahaina iti daytoy a proseso – ti input-yo ti agbalin a bato a pasuli ti pannakaisublitayo. Sangsangkamaysatayo a mangbangon manen saan laeng a dagiti pagtaengantayo, no di ket ti komunidadtayo— ket makatulong daytoy a plano tapno maiturong ti pannakaagastayo kadagiti kasapulan dagiti umilitayo.”

Maysa a kangrunaan a paset iti pannakaparsua ti Long-Term Recovery Plan ket ti pannakairaman ti input ti komunidad ti Lahaina. Manipud Setiembre 2023 agingga Hulio 2024, 3,833 nga umili ti Lahaina ken interesado a partido ti nakipaset iti 11 a nadumaduma nga aktibidad ken pasamak ti pannakipaset ti komunidad nga inaramid ti County’s Office of Recovery and Planning Department. Karaman kadagitoy ti 190 a testimonial ken interbiu iti publiko, tallo nga online survey ken lima a workshop iti sangakaarrubaan. Nairuar ti pakagupgopan a report daytoy a pannakipaset ti komunidad idi napan a bulan ken mabalin a kitaen ken i-download iti https://www.mauirecovers.org/lahaina .

“Daytoy a draft ti Long-Term Recovery Plan ti County ket naparsua babaen ti pannakitinnulong kadagiti kasosyo ti estado ken pederal ken dagiti maseknan iti komunidad, ken iramanna ti koleksion dagiti proyekto ken programa a mangipaay iti roadmap iti panagimbag kalpasan ti uram idi Agosto 2023,” kinuna ti Planning Director a ni Kate Blystone. “Makatulong met ti plano iti panangilasin ken panangseguro kadagiti gubuayan ti pondo para kadagitoy a proyekto, ken mangiwanwan kadagiti panagregget a mangpaimbag iti natalged ken naandur a wagas.”