Sumagmamano a bulan sakbay ti orihinal nga Enero 2025 a deadline, naikkaten dagiti rugit manipud iti 100 a porsiento kadagiti 1,390 a pagtaengan iti Lahaina Impact Zone

Dagiti maudi a sumagmamano a pagtaengan, agraman ti The Spinnaker apartment complex, ket naikkat idi ngudo ti Agosto, sigun iti US Army Corps of Engineers

“Dakkel, dakkel a milestone ken gapuanan dayta,” kinuna ni Lt. Col. Collin Jones, komander ti Hawaiʻi Wildfires Recovery Field Office para iti US Army Corps of Engineers, iti County of Maui Disaster Recovery Community Update Meeting idi Agosto 28.

Makatawen ti napalabas, ninamnama a mabalin a dua agingga iti tallo a tawen sakbay a mangrugi ti panagibangon manen idiay Lahaina.

Ita, 1,342 kadagiti 1,390 a na-clear a residential lots ti nakompleto met isu a naisublin dagiti rights of entry iti county ken dagidiay a makinkukua iti sanikua ket mabalinda ti agaplikar para iti building permit. Nangrugin ti panagbangon manen iti 20 a sanikua.

“Iti tunggal lote ket naikkat ken naibukbok ti baro a pundasion, rumangrang-ay ti rikna ti namnama iti intero nga ili ti Lahaina,” kinuna ni Mayor Richard Bissen. “Naparpartak ti panagrang-ay ngem iti impagarupmi. Agyamyamankami iti napateg ken napardas a trabaho nga inaramid dagiti pederal a kasosyomi, agraman dagiti nagaget a tripulantemi iti County, tapno mairugi dagiti umilimi a bangonen manen dagiti pagtaengan ken biagda.”

Ti Federal Emergency Management Agency ket nangituding ti US Army Corps of Engineers a mangimaton iti pannakaikkat dagiti rugit babaen ti pannakitinnulong iti Hawaiʻi Emergency Management Agency, US Environmental Protection Agency ken County of Maui.

Agtultuloy ti trabaho a mangikkat kadagiti rugit iti 68 a komersial a sanikua idiay Lahaina.

..